Шинэ мэдээ
Ерөнхий сайд У.Хүрэлсүх, УИХ-ын дарга Ц.Нямдорж...
2017-09-15 13:57:13   share

Засгийн газрын тэргүүний суудал эзэнтэй ч юм шиг, эзэнгүй ч юм шиг нэг л дүнсгэр хэд хоногийг үдэв. Тэргүүн гэлтгүй бусад сайд нар ч үүрэг гүйцэтгэгчээр ажиллаж байгаа. Харин Ерөнхий сайдын суудалд тэдний дараа хэн суух талаар МАН-ынхан нэг байр суурьтай байгаа аж. АН-ын гишүүдийн хуруу, хошууг оролцуулахгүйгээр дараагийн Засгийн газрыг байгуулах болсон мэдээ ирэв. Мэргэжлийн Засгийн газрыг огцроход гарын үсгээ зурсан 33 гишүүний талд есөн гишүүн нэмэгдэж, МАН асуудлаа дотроо шийдэх барьцтай болсон байна.  

  МАН бага хурлаараа У.Хүрэлсүхийг намын даргаар сонгосоноор Ерөнхий сайдын албанд томилогдож, тэрээр Засгийн газраа бүрдүүлэх юм. Мэдээж түүний байгуулах Засгийн газрыг намынхан нь төдийгүй ард иргэд ч шударга, зарчимч, улс эх орноо бодож, зүтгэж чадах хүмүүсээс бүрдэнэ гэж харж байгаа. Тэр итгэлийг ч алдахгүй нь мэдээж. Зангарагтай Ерөнхий сайдад харин зангарагтай УИХ-ын дарга хань болно. Тэр хүн нь УИХ-ын дэд дарга Ц.Нямдорж  гэнэ. Араншин нийлдэг энэ хоёр улстөрч дөрөө харшуулбал нүдээ оносон явдал гэж МАН-ын нөхөд нь үзжээ. Өөр өөрийн итгэл үнэмшлийн төлөө хатуу байр суурьтай энэ хоёр эрхэм Монгол улсын хувь заяаг зөв чигт хөтлөнө гэдэгт олон нийт ч итгэж байгааг сошиал дахь судалгааны  байдлаас харж болохоор.

  Жирийн иргэдийн дунд явуулсан судалгаагаар Ерөнхий сайдад У.Хүрэлсүхийг давамгайлан дэмжиж байна. Удаад нь мэдээж Ц.Нямдорж. УИХ-ын даргын индэрээс байтугай, жирийн гишүүний суудлаас хэнбгуайд үнэнийг нь улалзтал хэлж суудаг Ц.Нямдорж гишүүнийг тэр суудлаас харахыг хүсдэг олон фен бий. Түүний үг жинтэй, халуун, гашуун... Хэн нэгэн гишүүний буруу үйлдлийг өөдөөс нь харж байгаад хэлэхэд нь хэлүүлж суугаа нөхрийн нүүрний арьс урагдах шиг болж байх нь олон. Ц.Нямдорж , У.Хүрэлсүх хоёрын үзэл бодол ч нийлнэ. МАН-ын нөхдийн байр суурь үзэл бодол нэг зүгт чиглэх болсон нь сүүлийн үед анзаарагдаж эхлэв. Тэд асуудлаа дотроо ярьж эхэллээ.

  Сайн муугаа дотроо хэлэлцээд, муугаасаа хагацаж чадаж байвал бүр сайн. 2020 оны УИХ-ын сонгуулийн үр дүн шинээр байгуулагдах Засгийн газар УИХ дахь намын нөхдийн уялдаа холбоо,  хийсэн ажлыг үр дүнгээс шууд хамаарна. Тиймээс тэд одооноос эв эеийг хичээж эхэлжээ. Ер нь МАН-ын бүлгийн 65-ын дийлэнх нь нэгэн бодлого, зарчим дор зангидагдаж байгаа нь талархууштай явдал.  Тэд шудрага зарчим, ил тод байдлын дор нэгдэж байна. Нийгэмд тэднийг албаар шударга харагдахыг хичээж байна гэж өөнтөглөн үзэх хүн ч мэр сэр бий. Гэвч шударга байдал бол У.Хүрэлсүх, Ц.Нямдорж нарын натур үзз дээ. Нэгнь өөдөөс нь хараад чи тийм шүү дээ... гээд үнэнийг нь хэлчихнэ. Нөгөө нь шударга бус нөхдөд эр хүний ёсоор хариуг нь барьчихдаг. 

МАН-ын нөхөд энэ удаад зөв шийдэлд хүрч, эв эеийг олов бололтой. Энэ нь тус намд төдийгүй Монголын ард түмэнд ч тун хэрэгтэй алхам билээ. Төр төвшин бол түмэн олон амгалан гэдэгсэн. Төрийг төвшитгөх эрхэм үүргийг МАН-ын нугаршгүй, ухаршгүй хоёр эрхэм хүлээх нь гарцаагүй бололтой. 

З.Говьсайхан

 

НОМИНАЦИ